福岡拉麵 (Closed)

喺西灣河住左咁多年，對太安樓既認識就係多小食檔同車仔檔。雖然有太興同大家樂，但絕少會喺太安樓既食店坐低食...福岡拉麵都開左一斷幾長既時間，但因為佢近油站果邊，唔會成日行過，所以好多時都唔記得左佢...直到有一日想起咁耐都冇試過，就揀左去食晚餐。可能我係平日去，全店一半人都坐唔滿。又或者果邊真係太少人會行過啦!估唔到果個位咁細都可以開到一間拉麵店，而且座位尚算舒適。估唔到太安樓除左住宅面積實用，連店鋪都係一樣!不過啲梳化好似有啲舊，唔係話好好好乾淨果啲。不過喺太安樓搵野食都係平民性價比之選，不能挑剔太多。食物方面幾有驚喜：叫餐有小食，小食係一個似牛雜既物體，味道ok...不過賣相真係唔太吸引。滑蛋豬扒飯既豬扒剛剛炸起，唔會俾啲滑蛋浸淋哂。肉質都幾鬆化，亦炸得岩岩好，趣卜卜；滑蛋比較生，可以再多煮一陣，面頭配上紫菜、中間都有一啲菇。以街坊式既滑蛋豬扒飯黎講絕對係足料!另外叫既係牛柳粒(唔記得叫咩名)牛柳粒燒得好香口，肉質juicy，燒汁非常惹味。配埋薯角充滿鐵板風味。今次冇食到魚生，下次試下新唔新鮮先!雖然喺太安樓黎講價錢唔算平，但係佢既質素同銅鑼灣既日式西餐廳黎講佢既價錢絕對相宜!