泰苑小食

Open Now

Now Closed

經過嗰兩層行仲快過搭嘅扶手電梯，又再嘟多次安心作為入熟食中心憑證後，推門就去番我熟悉嘅《泰苑小食》。是日免費搭車，加上自從通咗宋皇臺站之後，整個九龍城又躍動起嚟，於是帶挈埋呢區食肆生意。由之前企舖門口熱情招呼你入去坐，到依家唔齊人唔俾入，或限時交枱，或不容加單……因此呢啲繁忙時間，寧願去番啲規矩冇咁多嘅舖。其實泰苑唔算小食，絕對係小館。冇嚟將近一年，品質keep到，炸蝦餅又彈牙又脆，食多舊都唔滯。串燒雞牛豬本嚟就係家人必叫。呢間串燒肯定全熟，配點嗰個沙嗲醬汁亦好惹味，但就要不停強迫症咁自行𦧲哂啲燶肉邊……食緊熱氣嘢特別想飲沙冰，尤其現場冷氣唔大，體感廿五六度，嗌咗青檸、菠蘿，超大杯飲極都有咁。近來去泰菜館都愛上泰式炒粉絲，少少酸甜。粉絲、剝殼鮮蝦留尾、花生碎…..有齊滑、爽、彈牙、少硬顆粒口感。特別想食軟殼蟹，冇配青芒沙律改用咖喱，大概6件，食到其中一件有濃稠蟹膏喺口腔綻放不知何故有啲中細獎嘅感覺。