樂園魚旦專家 (協和街)

Open Now

Now Closed

呢日同阿媽喺觀塘裕民坊睇醫生🩺，搞掂就喺附近搵啲嘢食咗先返屋企。喺協和街一過對面，就見到「樂園魚旦專家」。餐廳客似雲來，勁多街坊幫襯。無他嘅，食碗麵平平哋，又有冷氣嘆，加上啲店員阿姐招呼幾好，有禮貌👍。我同阿媽一人叫咗一碗麵🍜，食物好快就送上。五香牛腩麵($33)，加$7雙拼要墨丸。我非常滿意呢碗牛腩麵🐮，佢係最普通嗰啲牛腩，並唔係什麼貴價崩沙腩，但味道一啲都唔失禮。牛腩有好多件，而且每件嘅瘦肉、筋膜同脂肪分佈都好平均，肉味又夠濃郁，正！另外，幼麵則非常爽口，而且無鹼水味。樂園四寶丸河粉($42)，呀媽都話覺得佢嗰碗河幾好，河粉唔會太淋同碎濕濕，正常水平。🍢四寶丸包括魚蛋、魚角、魚皮餃、墨魚丸同埋豬肉丸，我哋一致認為魚蛋最好食，因為質感超Q彈😃，再嚟食的話會嗌淨魚蛋。飲品方面，我哋要咗凍西洋菜蜜(跟餐+$8)同埋凍柑桔蜜(跟餐+$11)，後者感覺滋潤，飲完喉嚨好舒服🍊，而且仲要唔係度度都有得飲。總括嚟講，樂園魚旦專家唔錯，如果想簡簡單單食碗麵，呢度會係一個好選擇。佢定價合理，份量多，湯底又唔油，下次經過都會再食🙆‍♀️。