一漁外賣壽司 (Closed)

聖誕三日紅假，其中一日入左嘉湖親戚屋企麻雀耍樂，通常一打都會打到食晚飯，個個打到唔願停，我就幫手落去買餸，去到頌富街市見哩間外賣壽司店幾多人幫趁，親戚都話未食過，所以我地就買左一盒返去加餸。一漁雖然只係一間外賣壽司小店，但見入面都有四五個人不停手，佢地除左壽司、飯卷同手卷，都有拉麵、烏冬同丼飯，而壽司大部份唔洗$10就有一件。等外賣時周圍望下，從玻璃窗可以睇倒佢地嘅廚房，感覺都乾淨企理。而最令我估唔到嘅係，哩類平價壽司鋪竟然會用人手握壽司，雖然比起機握會慢啲，但壽司飯就冇咁易散。壽司盛A($280/30件) - 壽司除左散叫都有set，當然會比散叫平少少，但款式就定左嘅。哩款30件嘅壽司set就包左三文魚、三文魚腩、吞拿魚、赤蝦、鰻魚、油甘魚、北寄貝、帆立貝、左口魚同八爪魚。魚生都幾肥美同大片，仲帶有光澤，唔差得過連鎖壽司店。總結，壽司唔差幾抵食，難怪咁多街坊幫趁。