川熙樓 (Closed)

朋友生日，四個人就去咗尖沙咀打邊爐，幫佢慶祝生日。朋友介紹之下，君怡酒店嘅火鍋好正，我哋就入去試吓。餐廳入面環境以紅色為主，而且裝修格局華麗，好有中國化嘅裝飾。餐紙有好多食物選擇，而且係任點任食兩小時，首先叫咗一個湯底就係鴛鴦湯底，麻辣清油鍋同埋當歸紅棗羊肉湯，飲一啖羊肉湯非常清甜，而且味道一啲都唔騷，好正。啤酒汽水都係任飲，有可樂、甘蔗水同埋加多寶等選擇，一個$298價錢任飲任食，真係好抵。當中有我最鍾意食嘅花雕雞件同埋安格斯肥牛片。雞肉嘅肉質好滑嫩，所以之後都一次過encore左幾份。除此之外，蟹柳棒、手打蝦滑、粉絲、冬瓜片、豬紅、炸響鈴同樣出色美味。埋單都只係1200，平均消費＄400有找，酒店級高級食材，加上價錢超值，食物質素一流，必定會再幫襯。