Video
Read full review
2011-05-09
15 views
跟老媽食母親節晚飯係每年其中一個麻煩大課題，佢口裡話無所謂，但實際好挑剔，一來佢唔想去食過嘅地方，二來如果去消費較高嘅餐廳，換來只有一大堆「梵音」...為免耳仔受罪，今年我選擇左一間差唔多俾人遺忘嘅老式平價中菜館 - 小杬公菜館小杬公菜館位於上環信德中心對面一幢商業大廈內，地點絕對唔吊腳，但奇怪地人氣甚低，在公開飲食網站上，差唔多五個月亦無一篇食評更新，莫非呢度已被其他星級食府光芒掩蓋？無所謂啦，反正要帶老媽食點冷門野，就睇下小杬公今時今日係咩水準...今晚選叫嘅全部都係小杬公名物，其中賣相最有趣嘅就係企鵝雞($188)。企鵝雞其實只係炸子雞一隻，上席時原隻燒雞先被吊在柱上示眾，再由侍應即席凌遲分屍上碟。燒雞肉嫩皮脆，皮下脂略帶點肥油，甘香無比，而且醃味功夫了得，果然不愧為招牌菜。酥炸鯪魚球($88)係黎呢度之前已鎖定嘅目標，因為我對「蜆芥」與「炸鯪魚球」呢個絕配係情有獨鍾。炸鯪魚球圓碌碌大大粒，外型上相當吸引，咬落熱辣辣又香口，入面更釀入蜆芥吊味，抵讚！呢度嘅蜆芥鹹鮮味好強烈，加上香蔥再煮，用來蘸炸鯪魚球實在非常好味。噴火醬烤骨($88)在錫紙切開後香味令人振奮，燒骨肉質鬆化，醬汁夠
小杬公菜館位於上環信德中心對面一幢商業大廈內，地點絕對唔吊腳，但奇怪地人氣甚低，在公開飲食網站上，差唔多五個月亦無一篇食評更新，莫非呢度已被其他星級食府光芒掩蓋？無所謂啦，反正要帶老媽食點冷門野，就睇下小杬公今時今日係咩水準...
今晚選叫嘅全部都係小杬公名物，其中賣相最有趣嘅就係企鵝雞($188)。企鵝雞其實只係炸子雞一隻，上席時原隻燒雞先被吊在柱上示眾，再由侍應即席凌遲分屍上碟。燒雞肉嫩皮脆，皮下脂略帶點肥油，甘香無比，而且醃味功夫了得，果然不愧為招牌菜。
酥炸鯪魚球($88)係黎呢度之前已鎖定嘅目標，因為我對「蜆芥」與「炸鯪魚球」呢個絕配係情有獨鍾。炸鯪魚球圓碌碌大大粒，外型上相當吸引，咬落熱辣辣又香口，入面更釀入蜆芥吊味，抵讚！呢度嘅蜆芥鹹鮮味好強烈，加上香蔥再煮，用來蘸炸鯪魚球實在非常好味。
噴火醬烤骨($88)在錫紙切開後香味令人振奮，燒骨肉質鬆化，醬汁夠濃稠，水準唔錯；而上菜時在錫紙上點火，視覺效果十足，但其實只算花巧動作，對味道提升幫助不大。
老實說我以前只係食過八寶鴨而未食過八寶鴿($148)，製法基本上分別不大，都係將蓮子、豬肉粒及薏米等塞入鴿肚內炆煮，食落因鴿肉較碎而且少左鴨肉果份羶香，感覺較食八寶鴨少左一份「重口味」，而鴿皮連蓮子等饀料一齊包住黎食，香氣獨特吸引，值得到來一試。
試過小杬公四大名菜後，再食老媽愛嘅砵仔焗魚腸($78)，魚腸食落夠爽又有蛋香，我就略嫌口感濕左少少之餘，蒜味較為強烈。用料方面則非常慷慨，雖然我平時較少食呢款小菜，但席上幾位食鹽多過我食米嘅長輩，都不約而同讚呢份焗魚腸出色，相信水準應該係對辦...
餐牌上見到豉油皇蒸豆腐竟然要$68一份，好奇心下決定叫來睇下有咩咁巴閉。豆腐尚算滑溜，豆香亦夠，但原來主角係果個好味到不得了嘅豉油皇，甜甜地極惹味，如果有碗白飯在手的話，單係落豉油送飯都已足夠，但要彈嘅係伴碟果幾條老菜，老到完全咬唔落口，令呢味本來簡單完美嘅小菜留下小小遺憾...
近期在名苑同逸東軒都食過有水準嘅馬拉糕，黎到小杬公見到有供應亦叫一客作甜品。點知馬拉糕送上時，大家都目瞪口呆，估唔到馬拉糕份量係咁少，而且賣相已覺得唔多對路。果然食落鬆軟欠奉，又硬又實，蛋香完全唔夠，真係事但搵間酒樓都好食過佢，失望至極！除左果份馬拉糕令人失望之外，整晚食物水準其實相當唔錯，而且六人同行每位都係$140左右，都算抵食，所以亦決定下次要到來再試埋乳豬同金錢雞。另外，小杬公採用會所形式，如果唔係會員都無問題，即場入會盛惠$30，仲送你一張堂食叉燒券，但有效日期只有一個月，絕對係一份「多很謝」嘅迎新禮物...
Post
