港嘢茶檔 (Closed)

同同學放學之後落咗九龍城，行過見到呢間新開嘅。最初覺得有少少伏（自己一向都有少少驚呢啲改名改到不倫不類同埋裝修扮到好懷舊嘅餐廳），但係同學話想入去試吓，同埋周圍又冇咩想食嘅嘢，咁咪入去試吓囉。去嘅時候係下午茶，人唔算多，坐得OK舒服。攞起餐牌見到啲嘢都幾懷舊，但係選擇唔多，又有好多野已經賣晒，最後叫咗兩杯凍奶茶、炸大腸、腸粉同埋炸雞肶。凍奶茶唔差，幾滑得來茶味都夠香濃，算係高水準之作。但係自己飲慣甜野，覺得有少少淡（但對普通人來講甜度應該算係適中）。炸雞肶雖然外皮有少少乾（應該係無可避免掛）但係裏面都算有肉汁同埋幾入味。沙律好味足料，比起出邊食到嘅有過之無不及，酸酸甜甜配埋雞肶幾夾。腸粉叫做冇乜驚喜，算係一般食到嘅腸粉，但勝在比出邊餐廳賣相更佳。全餐最好味嘅係炸大腸，大腸甘香得來冇乜餲味，口感酥脆，加上菠蘿嘅酸甜中和返個肥膩感，令到佢香而不膩。加上而家唔係太多地方有得食炸大腸，下次來必食!!!服務算係一般餐廳應有嘅水準。價錢雖然偏高，但係考慮到食物質素同埋環境，我覺得算係幾合理。食嘅時候聽到隔離枱話晚飯嘅嗰啲肉餅幾好，下次落去九龍城嘅話可以再去試！