香港大學校友會

Open Now

Now Closed

校友會餐廳裝修咗好一段時間，完咗之後都好想再去食一餐，今日就約咗幾位朋友一齊去。等人期間嘅前菜我哋叫咗一個黑椒牛肉小碟，牛肉嘅用料相當唔錯，唔似得好多餐廳因為牛肉唔靚，要用好多鬆肉粉，冇晒牛味所以間好重嘅黑椒味。呢度嘅黑椒牛肉牛味豐富得來又有鬆軟及油香，黑椒嘅味道只係錦上添花，甚至容易配搭嘅青紅椒都沾上左牛嘅香味。另一個老式廣東菜係鍋貼蝦，鍋貼蝦係用一整隻大蝦，上面再有芫荽同金華火腿。另外我唔記得影嘅係鷓鴣湯羹，好香鷓鴣野味味，響第二度真係好難食到。砂礓鮑魚雞煲係一個要預訂嘅菜式，預訂嘅時候佢哋都好貼心咁樣問我哋幾多位，預留返幾多隻鮑魚。鮑魚同雞都好鮮嫰，冇overcook。另一個唔記得影相嘅預訂菜係西檸軟鴨，而家好多酒樓都只做西檸雞，但我自己就覺得西檸鴨嘅香味好過西檸雞。最後嘅甜品我哋預留左兩隻紅酒梨，真心講，同西餐度食始終有分別，我唔係太鍾意紅酒汁用生粉水黎開，但佢隻啤梨非常大隻，除咗汁之外其他算係相當唔錯。不過下次我都會叫返傳統中式甜品。