西環碼頭 (Closed)

西環人推介的餐廳朋友未嫁前住西環，嫁左就搬左過海，但同我地班中學同學聚舊，都係要返返西環😜。佢推介西環碼頭，食過幾次，話質素幾好。睇menu見到好多野想食，除左海鮮仲有好多小菜可以揀，最後都係由西環人發辦，應該無錯。朋友果然信得過，叫左半隻芝麻雞，佢話每次必點。隻雞有個雞肉切成嘅雞冠，有造型，望落醒神。雞皮脆卜卜，好薄，芝麻香口，無肥脂肪，可以放心食(自我安慰mode)。雞肉已經去骨，好嫩滑，仲有碟柚子醬可以點，好好味！龍皇泡脆飯都令人好滿意！用熱鍋上枱，上枱後先倒一碗脆米落去撈，勁鍾意啖啖都有脆米嘅口感！海鮮料都好足，有蝦、蜆、蚌、魷魚，配埋粥，好鮮甜。侍應話黑松露醬燴豆腐係招牌菜，作為一個黑松露粉絲，一定要試下！豆腐石鍋上，熱辣辣，醬汁沸騰左好耐！有冬菇、秀珍菇同雞脾菇一齊，配埋黑松露，好入味！豆腐好大塊，好滑，整體都好好食！西環人果然無介紹錯！