LIFETASTIC (Closed)

話咁快就到三十幾度嘅夏天，西瓜係頭號wish list 水果，得知西環香港大學站一出有間店有特色西瓜蛋糕食，今晚終於可以食到啦！餐廳氣氛輕鬆舒服，落地大玻璃加上有趣嘅壁畫，係一個可以放鬆心情品嚐美食談天嘅地方。晚餐食set 比單點化算，兩個人細食嘅話可以揀要兩份頭盤加一份主餐，我地好餓就揀咗一份頭盤兩份主菜。套餐包括餐湯或沙律，頭盤揀咗煙三文魚釀蟹肉配魚子醬，四小件清新開胃。主菜揀咗廚師推介嘅鹹蛋黃美國雞髀肉本菇意大利麵，走健康路線嘅佢有少許鹹蛋黃嘅鹹香，雞髀肉爽口，意粉軟硬度適中。令一個主菜揀咗意大利腸配水牛芝士意大利手工薄餅，佢仲有牛油果洋蔥新鮮蕃茄做餡料，薄餅薄趣有麵粉香，鮮蕃茄醬汁加上香滑牛油果，鹹香意大利腸，非常好食。食完主菜終於到期待已久嘅蛋糕啦，我怕會賣曬，一早打電話book 咗件西瓜蛋糕。草莓西瓜蛋糕有滿滿嘅草莓凍加上鮮厚西瓜層，蛋糕鬆軟唔甜，係夏天蛋糕首選，另外芒果熱情果蛋糕，酸甜清爽，係另一個好選擇！餐飲揀咗鮮打嘅smoothie , 牛油果健康唔甜，香蕉朱古力濃香甜滑。佢正在做會員優惠，食滿＄200可以做會員今個月午餐有小食送，佢午餐同下午茶都有啲set幾抵食。