神豚 (Changed Hand) New Restaurant

前幾日，我個best friend生日，所以就帶咗佢去一間拉麵店食生日飯。之前上網見到呢間神豚係日本好犀利，今次就係香港開咗分店，選址西營盤，岩哂我地兩個西環友！一入去見到個半開放式廚房，鋪頭細細，好有日本餐廳feel。餐牌嘅選擇唔多，因為佢要承傳「種類小，質素高」嘅宗旨，我地兩個分別揀咗濃厚鹽味豬骨拉麵同濃厚豬骨拉麵。佢呢度嘅拉麵有兩種麵底可以揀，有細麵同波紋麵。我地一人叫咗一樣試下。波紋麵好爽而細麵又唔會太稔，有質素！我個鹽味濃厚湯底就會稠身小小而普通濃厚湯底就會稀小小，兩款都唔會好鹹，同食嘅時候，湯汁可以掛到上麵條上面，認真唔錯！加上有三塊大大塊嘅叉燒，好足料，好食過某某連鎖店好多好多！另外，我地仲試下佢嘅小食，炸雞軟骨，炸得啱啱好，唔會太油，幾鬆化，又多，好野！大家快d嚟西營盤試下佢地嘅拉麵啦！