姨婆瑪麗 (Closed)

老實講，姨婆瑪麗呢個舖頭名稱的確係有啲怪，第一次聽到嗰陣仲以為會係一啲新派到唔新派嘅前衛菜式，但其實裡面賣嘅都係啲好正常嘅嘢，一啲都唔怪，而車仔麵更加係主打。至於嗰啲「辣死你媽」同「辣死你姨媽」，其實都只係想玩吓嘢，想表達「好辣」咁嘅意思。猴子點咗個四餸車仔麵，油麵配怡保雞湯底，材料有炸魚蛋、豬軟骨、豬紅，同埋餃子，飲品方面就叫咗豆漿。同其他車仔麵比較起嚟，姨婆瑪麗係偏向清淡，唔似得其他車仔麵檔咁油膩。不過佢嘅油麵就同一般用開嗰種黃色嘅唔同，口感上冇咁彈，食落亦淡味啲。至於豆漿就係獨立封裝，乾淨衛生，飲落都覺得滑啲。另外值係一提嘅係佢哋夠環保，點菜紙係一張過咗膠嘅A4紙，用顏色筆點菜，由於係膠面，所以可以循環再用。