Plato Cafe & Bistro (裕民坊YM²)

今日放假，約朋友去食late lunch chill吓。朋友介紹嚟到裕民坊Plato cafe，佢話呢度啲set lunch性價比好高，仲有甜品打卡。呢度嘅set lunch包咗沙律或者餐湯，主菜同埋一杯熱飲，仲可以追加小食同埋甜品。我哋兩個人都揀咗田園沙律，有蕃茄仔，青瓜同埋沙律菜，以黑醋汁調味，清新爽口。澳洲肉眼牛扒$148 牛扒有得揀薯菜，意粉或者飯，我哋揀咗薯菜。牛扒揀咗五成熟，火候控制得好好，大大塊，煎得好香，入邊呈現粉嫩粉紅色，肉質唔錯，配紅酒肉汁，呢個價錢冇投訴。薯菜有香脆炸薯條，燒豆角同埋蕃茄仔。西西里海蝦意大利飯$78呢個飯無論賣相同埋味道都有驚喜，蕃茄味香濃加香蒜味，個飯好Creamy，啲海蝦有四隻，每隻都大隻，爽口彈牙。牛角窩夫配雪糕$38我哋追加咗一個甜品share。擺盤靚靚，粉紅色忌廉加上玫瑰花瓣仲有啲朱古力醬。牛角窩夫新鮮熱辣，超級香脆鬆軟，配埋香滑忌廉同埋雲呢拿雪糕一齊食，仲有少少楓糖味的脆米，邪惡又好味。餐飲方面我揀咗熱柚子茶，仲有塊檸檬響入邊。朋友加咗$8要咗expresso Macchiato 。大家嘆住飲品同甜品慢慢坐吓過咗個開心嘅下午。