Le Three (Closed)

今日同女朋友行完apm,想搵間有有特色既餐廳食個晚飯醫下肚仔咁，所以我地就黎左Le Three 度食。餐廳裝修簡約，有海邊碼頭餐廳既感覺。我地叫左兩個set dinner:餐湯有龍蝦湯，主食有紅菜頭忌廉汁雞肉鮮蝦闊蛋麵(HKD 148)同埋照燒厚切比目魚扒(HKD 188)，前菜就有煙三文魚藜麥沙律。而餐飲就有鮮雜果紅莓茶，甜品就叫左Creme Brûlée (套餐+HKD 28)。個龍蝦湯好好味，非常濃郁，個拉花真係唔錯，幾靚。個沙律份量幾大，煙三文魚好大塊，啖啖肉，啲藜麥又多。個比目魚扒肉質非常鮮嫩，又大塊，賣相唔錯，我個人幾鍾意佢既秘製醬汁。個紅茶頭意粉係粉紅色，賣相好靚，有好香忌廉味，而食落去就好滑，口感唔錯。雞肉肉質都唔錯。個紅莓茶好清新，有紅莓同藍莓食，如果想甜啲既，可以選擇落多少少糖漿。至於個甜品就賣相幾好，個面夠哂焦糖香味，而佢仲用左雲尼娜籽整既添。