花園餐廳 (康寧道)

Open Now

Now Closed

話說呢間位於康寧道晨光大厦嘅「花園」，從裕民坊多年樓上舖搬到嚟呢處都經已年計。小弟入到嚟準備寫食評時一睇，真係何其唏噓，想當年旺起上嚟客倌要企樓下吹風食塵等位嘅港式著名扒房，如今不但食評寂寥，就連臨打烊前一個鐘上到去，都顯得冷冷清清。原個叮熱鬆軟餐包配以原粒安佳牛油，放响呢一個好似從來都唔會洗同換嘅麵包籃入面，罅隙之間總係有啲揮之不去陳年麵包碎，就好似童年時望住街邊雞蛋仔留口水。嗱識飲就梗係飲紅湯，絕對唔會飲由麵粉溝成嘅白湯。睇睇孖份T骨扒個造型先。嚟多張橫切面。可能由於客已經少再加上就快打烊嘅關係，扒好明顯未完全解凍就烤，造成難切、切開之後冇肉汁、未入口已經起哂渣嘅嚴重水準問題。好在有個蒜汁頂住，但係T骨周邊肉質明顯太生，趕住收工嘅嫌疑好大。牛味唔及西冷同肉眼，以呢個價錢，下次我都係食番肉眼穩陣，但係呢個「下次」將會係「明年之後。」睇左呢兩杯仍然可靠嘅餐飲份上，我畀個「ＯＫ。」明年今日再會！