點點甜 (Closed)

而家既天氣熱到溶，出去旺角行街熱到就中暑，最啱去食雪糕甜品降下温，響旺角新寶戲院同一條街有間甜品店叫“點點甜”。甜品選擇多樣化，有女士們最喜愛嘅日系宇治抹茶雪糕，亦有台式口味芋圓，仲有本地代表楊枝甘露同榴槤雪糕等等。我哋點咗“宇治森林”， 呢個甜品以宇治抹茶軟雪糕作主打，配襯豆腐花作底層，然後一層粟米片，再加上抹茶啫哩、小丸子、紅豆，包含不同層次，紅豆同小丸子配抹茶雪糕一齊食絕配，抹茶雪糕又軟又滑又濃，豆腐花夾粟米片又另一口味，十個推介。見到牆上面有個土司套餐， 呢個屬於下午茶甜品套餐，下午一點至晚上七點先有。呢個下午茶抵好抵食，有兩塊吐司配雪糕，土司烤得香脆，中間切成一粒粒，雪糕夾埋土司一齊食，一冷一熱口感非常好。而且呢個下午茶餐仲包埋一杯梳打飲品，有芒果梳打、百香果等等，梳打底部充滿百香果，以呢個價錢非常抵食。另外我哋再點咗一個“芒果天使”，“芒果天使”底層係奶凍，奶凍 上一層芒果粒，再加上3.6牛乳軟雪糕，軟雪糕加埋芒果粒好夾，但對比起“宇治森林”會稍為遜色。