Video
Read full review
2014-08-17
3503 views
759阿信屋四年前只係一間零食店,專走薄利多銷路線,近年業務擴展至糧油雜貨,酒類,急凍食品,嬰兒用品,家庭用品,寵物零食,個人護理用品及化妝品,真係多元化,估唔到而家進軍飲食界,開設雲吞麵舖 呢間雲吞麵師傅,以前o係觀塘工廠區一間茶餐廳主理,o個間茶餐廳因為做唔住執笠, 759阿信屋老闆林偉駿o係觀塘返工,以前試過佢地o的食物味道相當唔錯,今次就搵返呢位雲吞麵師傅黎開檔759雲吞麵位於長沙灣道與東京街交界,鄰近長沙灣地鐵站,附近有多個公共屋村,琴日係第一日正式營業,除左附近街坊黎幫襯,仲吸引到一班阿信屋支持者黎朝聖! 本人及朋友琴日下午要到長沙灣迷你倉執野,之後去759雲吞麵食晚餐,我地大約8:30pm 去到,諗住已經過左晚飯繁忙時間,冇咁多人等位,估唔列新開張o既號召力幾大,呢個時間我地兩個人都要等30張檯先有位 其實我地等位時已經諗定叫乜野食,不過落單時先知道原來好多野都售罄 我本身冇諗住食雲吞麵係因為肚餓想食飯,同埋聽講佢地巴基斯坦式咖哩係推介食品,咖哩唔係用星馬泰式椰奶黎煮,而係用印巴式o既花奶煮,再配大量薯蓉,咖哩香滿瀉,聽到介紹一心黎到想試下咖哩牛腩,點知除左牛腩賣
759阿信屋四年前只係一間零食店,專走薄利多銷路線,近年業務擴展至糧油雜貨,酒類,急凍食品,嬰兒用品,家庭用品,寵物零食,個人護理用品及化妝品,真係多元化,估唔到而家進軍飲食界,開設雲吞麵舖 呢間雲吞麵師傅,以前o係觀塘工廠區一間茶餐廳主理,o個間茶餐廳因為做唔住執笠, 759阿信屋老闆林偉駿o係觀塘返工,以前試過佢地o的食物味道相當唔錯,今次就搵返呢位雲吞麵師傅黎開檔
759雲吞麵位於長沙灣道與東京街交界,鄰近長沙灣地鐵站,附近有多個公共屋村,琴日係第一日正式營業,除左附近街坊黎幫襯,仲吸引到一班阿信屋支持者黎朝聖!
本人及朋友琴日下午要到長沙灣迷你倉執野,之後去759雲吞麵食晚餐,我地大約8:30pm 去到,諗住已經過左晚飯繁忙時間,冇咁多人等位,估唔列新開張o既號召力幾大,呢個時間我地兩個人都要等30張檯先有位
其實我地等位時已經諗定叫乜野食,不過落單時先知道原來好多野都售罄
我本身冇諗住食雲吞麵係因為肚餓想食飯,同埋聽講佢地巴基斯坦式咖哩係推介食品,咖哩唔係用星馬泰式椰奶黎煮,而係用印巴式o既花奶煮,再配大量薯蓉,咖哩香滿瀉,聽到介紹一心黎到想試下咖哩牛腩,點知除左牛腩賣晒,亦都冇咖哩
朋友叫左一碗招牌雲吞及原味牛孖筋河粉$35,另外加$8要杯凍檸茶
我就要左五香牛雜飯$50,呢碟飯附送熱飲,我就加$2轉飲凍檸茶
雲吞麵店o既裝修幾似一般759阿信屋分店,都係用類似o既燈及吊扇
牆壁貼上唔同圖畫,應該係以前759阿信屋舉辦比賽o既學生參賽作品
最先黎到係兩杯凍檸茶,留意到佢地採用高身杯,份量係明顯較大杯 飲品唔係咁夠凍,落左好少冰粒,隔左一陣已經冇乜冰未溶,唔知係唔係佢地刻意安排,令食客有足料o既感覺
好多茶餐廳凍飲都係落左超過半杯冰,溝淡杯飲品 ,早前有報導話有間茶餐廳要飲品少冰o既客人俾多$2添,由此可見,好多食肆落多o的冰係想節省成本
呢杯飲品比較大杯,不過只得三片檸檬,我認為應該落多一兩片檸檬先夠味朋友o既招牌雲吞及原味牛孖筋河粉快過我碟飯黎到,蔥粒先放o係匙上,再由客人決定落幾多份量,河粉份量較正常麵舖多大約兩成,聽朋友講o的牛孖筋幾淋
一粒雲吞有兩隻蝦,食落都幾彈牙,湯底係由大地魚煲出黎,雲吞係由師傅每日即包即煮,大約用6秒就包好一隻雲吞,絕對足料新鮮又有人情味,而家好多麵檔為左節省成本,採用工廠交黎o既貨
雲吞o既蝦係帶黎鮮味,豬肉係帶黎甜味,聽到隔離檯有食客嫌雲吞冇乜豬肉呢間雲吞麵採用公雞碗,我覺得幾得意 ,其實而家愈來愈多新派食肆用公雞碗,可能想用黎扮懷舊感覺
五香牛雜唔係預先整定咩? 唔知乜野原因,朋友碗河粉差不多食晒,我碟五香牛雜飯都未黎到 ,伙計已經幫手催單,真係等左好耐先黎,如果唔係對阿信屋o既支持,真係覺得離晒大譜!
等到頸都長,五香牛雜飯終於黎到呀!
見到咁大碗牛雜,真係冇令人失望,白飯係另外用碟上,聽講o的飯係用返759阿信屋有得賣o既火鳳凰頂級泰國香米黎煮
牛雜好多部位都有,仲有五,六件蘿蔔,蘿蔔都算淋,不過唔知點解我朋友o個碗河粉食到o的牛筋係淋,我呢碗牛雜好多件都係唔淋 ,冇理由水準咁唔穩定
碗湯雖然唔夠味,不過我都飲晒
總括黎講,$50呢個價錢o係長沙灣呢o的基層地區黎講唔算平,不過份量真係多過普通茶餐廳好多,牛雜幾大碗幾抵食,份量適合男士,如果女士就最好同人 share
我地兩個人埋單係$95,有得八達通俾錢,我鍾意! 好多食客都諗住有759會員卡可以有折扣優惠,不過呢間雲吞麵暫時都冇特別優惠俾阿信屋支持者
$30碗雲吞麵,份量係幾多,只可以話價錢合理,唔少人認為市面最便宜o既雲呑麵只係賣$14一碗,又有人估唔到食碗雲吞麵會貴過食譚仔米線,加杯凍飲要另加$8 添!
新開張太多人幫襯,唔做外賣,根本都做唔切生意,好多野都賣晒,水準唔穩定,真係有好大改善空間伙計有幫手催單,可惜情況太亂 ,廚房師傅都顧唔到太多,見到員工做到冇得停都幾辛苦
雖然好多野都未及預期,不過員工服務態度好好,另外衛生環境會比其他雲吞麵舖好
今次759阿信屋踩過界搞雲吞麵生意,究竟係一份誠意,抑或係為左綽頭? 唔同人有唔同意見,老闆話雲吞麵店係做街坊生意,唔請靚女明星剪綵,寧願慳返o的錢俾街坊食好o的
有人認為佢地公司雖然冇乜花錢賣廣告,不過老闆好識得借傳媒製造新聞,亦有人認為佢地集團影響市場混作,汰弱留強,無論如何,今次搞作算係俾消費者多一個選擇
睇報導講過,佢地遲o的會o係葵涌光輝圍開分店,另外o係九龍灣搵緊舖位
日後有機會再去759雲吞麵,一定要試下「巴基斯坦」咖哩牛腩,同埋希望唔洗等咁耐啦!
Other Info. :
醒目貼士:
- 聽人講呢間雲吞麵應該會落蝦子,或者廚房忙得滯唔記得左落,記得叫伙計落返
- 有余均益辣椒醬供應
(The above review is the personal opinion of a user which does not represent OpenRice's point of view.)
Post
