濠客蒸氣海鮮 (Closed)

好一段時間冇入元朗食嘢，地膽朋友帶咗我去呢間超抵食嘅海鮮餐廳，主打蒸氣海鮮套餐。餐廳有幾款海鮮套餐，我哋揀咗$298嘅黃金套餐，海鮮拼盤好豐富，非常吸引。侍應消毒餐具之後先為我哋加入粥底，有瑤柱絲同南瓜粒。澳洲龍蝦尺寸唔細，肉質結實彈牙，仲有鮮黃色嘅蝦膏，好鮮甜。帶子尺寸亦唔細，鮮甜美味。鮑魚更加係大大隻，肉厚彈牙，而且清潔得非常乾淨。蚌類同元貝味道鮮甜，貴妃蚌更加係非常爽口。海蝦唔算好大隻，但勝在鮮味十足。象拔蚌超巨型，而且好新鮮，肉質爽口彈牙，一啖放哂入口非常滿足。重頭戲當然係奄仔蟹，每人一隻，大大隻仲要有膏，肉質亦好實淨。完成種類豐富嘅海鮮之後，當然要食返啲蔬菜，蔬菜份量剛剛好，而且都幾新鮮。最後當然唔少得食埋吸收哂精華嘅粥底，鮮甜得嚟唔會太鹹，味道啱啱好。今餐食得非常滿足，侍應服務一百分，食物蒸得啱啱好，換碟亦換得好頻密，重點係平日唔需要加一，三百蚊有找就食到咁豐富嘅海鮮大餐，性價比好高，又一次證明要食得豪唔一定要消費高！