老鳳冰室 (Closed)

今日約左朋友去葵芳行街，知道附近開左間茶記老鳳冰室，而且冰室既裝修好特別，有好多經典既街牌、舊海報、鐵信箱，就連menu既設計都好有心思。以前好興既懷舊小食包括蝦多士、雪糕紅豆冰、鐵板餐都有，亦有其他新式小食，就好似鹹蛋黃西多士同芝士保齡球，有選擇困難既我好難揀啊！我地叫左個芝士牛肉濃茄湯通粉，個餐包埋牛乳炒蛋配肉醬焗薯泥($48) ，感覺都幾抵食。通粉鋪左一層芝士，建議攪拌一下連通粉一齊食。至於蕃茄湯底，個人覺得比較稀，略嫌蕃茄味道較淡。因為個餐跟埋個炒蛋同薯泥，薯泥配埋肉醬一齊食，味道吾錯，個人幾鐘意。原先我地想試都幾多人鐘意既芝士保齡球，當時下午2點半，想叫既時候已經冇晒，如果想食既話，記得留意時間。所以我地叫左個鹹蛋黃西多士($28)，聽講切開之開後會有流心，好期待。西多士炸到金黃脆，賣相一流，侍應仲提我地要趁熱食，雖然切開之後並冇流心，不過中間既鹹蛋黃醬都好好味，真係值得一試。值得一提既仲有依杯原粒波波奶茶，黎到時候係有粒好大粒好似雪人形狀既奶茶冰，可以keep住奶茶既味道之餘仲可以攪碎d冰連奶茶一齊飲，口感都幾特別架！