Séan Cafe (Closed)

女士必到打卡既Café，成間以花做主題，如果中意花既女士黎到一定好開心興奮，男士係呢啲時候又係化身專業攝影師既時候。Café內外座位唔算多，但內裡裝飾好用手，十分多花既擺設，仿如入左花花世界。食物選擇晚餐有SET，由$78-$228不等，亦有散叫，今日到此係食飯後甜品，所以就冇試到佢既主食。玫瑰班戟　$78擺盤精美，女士們一定見到就心心眼同埋不停用手機影相，班戟份量唔算大，以兩片班戟中間夾住一層Cream，而班戟之上都係仲有一大陀Cream，叫得自己做玫瑰班戟當然係以玫瑰味為主，原來Cream係就玫瑰味，玫瑰味幾出而不甜，比較清新，唔似平時食既班戟咁濃味，Cream亦都打得好幼滑，不過Cream食太多會覺得膩。玫瑰鮮奶咖啡 $42又係女士喜歡既打卡飲品，成SET都係粉紅色，再加上放上玫瑰花做裝飾同埋有榛子佐口。一飲玫瑰花香味十分出，唔算太甜，不過由於都係用玫瑰糖漿沖出黎，味道始終有啲糖水味。整體食物好用心去擺盤，食物質素都OK，唔會只係得個樣，帶女朋友黎一定可以哄到佢開心，一間用心經營同時又顧及愛打卡一族既Café。