阿四車仔麵 (Closed)

車仔麵（滷水蛋、雞翼、蘿蔔、牛腩、大腸、炸墨魚卷）$79 豉油雞髀 $26麻辣牛柏葉 $26炸豆腐 $22樽仔奶茶 $18今日終於出旺角，唔係喺葵廣😂突然又好想食車仔麵就去咗呢間阿四車仔麵！店舖幾乾淨企理👍🏻叫咗碗車仔麵，牛腩同滷水蛋好入味，唔錯，瑞士雞翼仲正，一食肉同骨就分開，煮法好似以前細個媽咪整雞翼俾我食咁，我鍾意，童年回憶又返晒嚟😂蘿蔔煮得夠淋，吸晒啲汁幾正，冬天食蘿蔔是常識性！大腸同墨魚卷就不過不失啦！之後到我成餐最鍾意嘅炸豆腐，我真係好鍾意食豆腐，佢呢隻唔係有好多份癡住，豆腐應該用比較硬身嘅豆腐嚟炸，一碟有幾大舊再加埋chilli sauce，正，如果有啤酒飲一定超好送酒😛炸豆腐可以叫一碟或者係車仔麵嘅其中一個餸，如果係車仔麵嘅餸可以問吓店員可唔可以分開上，咁就唔會淋啦！之後仲有一隻勁大隻嘅豉油雞髀🍗啖啖肉又係超入味，諗起都再想食🤤麻辣牛柏葉我就覺得可以辣啲，朋友就覺得已經夠辣😂最後推介大家飲埋樽仔奶茶，茶香味濃，雖然冇得話走甜，但我覺得都唔太甜，不錯不錯！下次一定嚟食埋其他嘢，但炸豆腐一定唔少得🤤