頤庭冰室

Open Now

Now Closed

偶爾經過西環呢間冰室，望到門口個餐牌好似幾吸引，就入咗去試下。叫咗是日午餐「芥末三文魚忌廉焗海鮮飯」，配汪阿姐，送例湯。芥末同三文魚真係絕配！一啖飯放入口，一股清新而又有少少刺鼻嘅芥末味就湧上嚟，再加上少少忌廉輕輕中和咗，非常醒腦提神又開胃，好啱冇乜胃口嘅夏天食。而配料方面，除咗有好多三文魚粒外，仲有勁多款海鮮，包括蜆肉、魷魚粒、八爪魚仔、蝦仁、蟹柳，同手掌心咁大塊嘅鱈魚柳，真係未試過海鮮飯會有咁多款嘅海鮮！雖然啲海鮮預咗係急凍，但係鮮味嘅鮮味、彈牙嘅彈牙、爽口嘅爽口、軟滑嘅軟滑，絕對係急凍海鮮中嘅上品。是日例湯係合掌瓜甘筍煲豬骨，啲瓜煲到好腍 ，飲落好濃甜，唔覺有味精或雞粉，都幾好飲。汪阿姐不過不失，不贅。