一風堂 (朗豪坊) (Closed)

今晚我們去咗旺角朗豪坊嘅「一風堂」食晚飯！我們叫咗特製黑拉麵、黑雲吞、鰻魚飯、溫泉蛋叉燒沙律、溫泉蛋豚肉丼、牛油果熟蝦伴山葵醬同一風堂叉燒角包！特製黑拉麵嘅豬骨湯底非常濃郁，再加埋黑蒜油，令到味道更加香口惹味，拉麵嘅麵質係比較粗身，所以更加爽口彈牙，口感更加豐富！黑雲吞嘅皮都幾煙韌彈牙，但餡料嘅份量就比較少！鰻魚飯嘅鰻魚肉質非常嫩滑彈牙，炒飯炒得鑊氣十足，味道相當惹味！溫泉蛋叉燒沙律嘅賣相非常吸引，叉燒嘅肉質好腍好鬆軟，炸麵炸得相當香脆！溫泉蛋豚肉丼將溫泉蛋、豚肉同酸薑撈埋一齊食，酸酸嘅味道相當惹味醒胃，豚肉嘅肉質亦好嫩滑！牛油果熟蝦伴山葵醬嘅熟蝦非常爽口彈牙，牛油果相當香滑，山葵同沙律醬加埋一齊嚟做醬，真係好惹味，不過唔會攻鼻！一風堂叉燒角包嘅叉燒味道好香甜，包質相當香滑鬆軟！