花丸 (Closed)

超好玩日式自製料理，章魚燒大阪燒日式炒麵同燒肉一應俱全，今次就玩咗其中幾款😛必玩一定係章魚燒，畢竟冇乜人會為咗玩呢個而專登買部機返嚟😂 呢度好貼心咁將所有材料幫你分門別類好，好細心咁教你點整，整完出嚟個成品有板有眼，連地獄廚神嘅自信心都即刻返晒黎😂 章魚燒有八種口味，我揀咗招牌花丸燒，除咗八爪魚粒之外仲有麻糬，食起上嚟更加煙韌✨另一款好玩之選日式炒麵，能夠滿足兜下兜下嘅快感又唔會好似大阪燒咁複雜😂 佢仲有五款可選，揀咗安格斯牛柳條，啲牛都幾靚，同埋製作過程中落醬份量都係自己決定，可以落勁多醬同紫菜碎，最開心係蛋黃醬都可以任你吱😏小食方面點咗碟鹿兒島產黑毛和牛牛柳粒，初時見佢明明係和牛但賣四十幾蚊應該好細粒，但個份量有幾OK，肉質靚就唔洗講，最重點係佢個自家製燒肉醬油係超好味，就連柚子控嘅我都覺得呢個醬油好食過隔離個柚子醬好多😍 最後仲叫多個豚平燒，啲料似日式炒麵但走麵，重點係上面個蛋，影完相店員會響中間切一刀，然後入面啲單張好似瀑布咁流出嚟好正囉😍又有得玩之餘價錢又唔貴，食到飽咁樣都係三百零蚊，又坐得舒服，好過去連鎖果啲排餐死😌