餃掂手工餃子雲吞專門店 (Closed)

放假專登跟朋友嚟食呢間餃掂，一出太子站行3分鐘就到，真係幾方便。見到佢lunch time入面坐滿晒人，就知道佢啲嘢食一定好有水準。我地嗌咗佢嘅招牌菜，至尊松茸豬肉餃跟狀元九鼎湯，啲餃子賣相非常好，一咬落去就食到好新鮮嘅豬肉，啲肉汁咇晒出嚟，仲有好香嘅松茸味。佢嘅狀元九鼎湯飲得出真係落足料，有好重嘅粉葛味，一啲都唔油，感覺好健康。另外我哋嗌咗佢嘅龍鳳松茸煎雙餃。一擺上枱就聞到好香嘅松露味，煎到熱辣辣、脆卜卜嘅餃子一樣好多肉汁，黑松露同白松露嘅味都好出，真係食到停唔到口。黃金原味皮蛋個賣相都好吸引，皮蛋好通透，擺入口唔會有好重好重嘅皮蛋味，反而越食越香，個人認為就算平時唔鍾意食皮蛋，都一定要試吓呢個黃金原味皮蛋。上湯松茸時蔬都好有驚喜，啲菜好新鮮，配埋好香嘅杞子松茸上湯，真係好正。嘢飲方面，我哋要咗佢嘅自家製山楂雪梨水，因為有山楂，所以飲落酸酸甜甜咁，非常之開胃同埋解渴。一邊飲雪梨水，一邊食至尊餃子，真係好歎啊。