木船泰國粉麵專門店 (Closed)

冇諗過大埔都可以食到一間咁好食又好抵食嘅泰國菜。咁岩今日五點幾經過翠怡花園，又差唔多食晚飯，見到好耐冇食過泰國菜，價錢真係好平，所以諗都冇諗就入咗去食。我見到佢個黑豚腩肉真係好吸引。可能因為五點幾嘅關係，人雖然唔係太多，我見大部份人都係食緊下午茶，我大概七點左右離開，已經坐滿晒人，真係好誇張，而家呢個時勢平日仲可以坐滿人，呢間餐廳應該都幾好食。眼見啲嘢食真係唔貴，價錢大概都係$40至$70左右，泰國嘢來講真係算抵，另外佢仲可以加啲小食，每款小食都係10幾蚊。個泰汁燒黑豚肉丼每塊豚肉都燒到有少少脆邊，好爽口，下面啲飯充滿着腩肉嘅汁真係好好食。小食叫左份芝士磨菇雞翼，入邊嘅芝士爆汁出嚟，鍾意食芝士嘅人千祈唔好錯過。之後叫咗份炸魚餅，魚餅外脆內軟，又夠味，$13加配我覺得真係好抵。最後叫咗杯泰式奶茶，因為我平時飲開港式奶茶，所以我覺得泰式奶茶嘅味道比起港式奶茶係偏甜少少，所以我俾唔到comment，但係我覺得都幾好飲。