粵來順 (Closed)

由於早前我們喺午飯時間嚟旺角登打士街嘅「粵來順」食過覺得出品相當唔錯，所以今晚我們特意喺晚飯時段嚟食，一嚟到就見到較早前好朋友同我們講嘅一樣，有好多人喺門口排隊等位，我們起碼等咗半個鐘先有位！我們叫咗八寶燉冬瓜湯係每日原個燉盅新鮮即燉，湯底嘅味道非常清甜，同材料相當足料豐富，同埋喺而家炎炎夏日嘅天氣飲呢個湯，真係特別覺得消暑解渴！鴛鴦鷄係用兩款鷄組合而成，分別係蜂蜜豉油鷄同客家走地鷄，肉質就極之嫩滑，就算鷄胸嘅位置都完全唔會有「嚡」嘅感覺，可以一次過食到兩款鷄，感覺好有創意同特色，兩款鷄之中，我們比較鍾意蜂蜜豉油鷄，因浸得好入味，但唔會有鹹嘅感覺，而且食落仲會散發出蜂蜜嘅香甜味，真係好正呀！籠仔荷香糯米蒸膏蟹一打開個蒸籠蓋，就有一股香氣撲鼻，由於師傅將膏蟹擺放得好整齊，所以令到賣相更加吸引，膏蟹嘅蟹膏份量超多，質感好甘香軟滑，蟹肉嘅肉質非常鮮甜嫩滑，舖底嘅糯米飯質感好煙煙韌韌，而蟹肉嘅精華，仲有蔥花同蒜香嘅香氣都滲透晒入糯米飯入面，令到味道更加芳香惹味，令正在「扮減肥中」嘅我，都食到停唔到口，真係好正呀！西施蛋白炒龍躉腩聽店員話係用50斤嘅龍躉魚腩位置，所以肉質超結實彈牙，味道相當鮮甜