勝興潮州打冷

Open Now

Now Closed

好耐好耐無食過潮州野, 成日都想去食, 但總係比其他餐廳吸引左. 今日終於的起心肝同朋友一齊食勝興, 雖然平時都有食開, 但今次真係好想特別稱讚個蠔餅! 因為真係做得非常好.蠔餅炸得非常乾身, 不油膩, 完全係外脆內軟, 蠔仔好肥好甜, 一點腥味都冇. 由其呢個蠔餅落咗大量既蔥同芫茜, 陣香氣真係會留係個口度. 久久不散. 另外, 如果食既時候再配上潮州醋一齊食的話, 真係連少少油膩既感覺都無埋, 超正!仲有呢個啫啫雞煲亦都真係超夠鑊氣, 師傅用咗大量料頭去爆香隻鑊, 當再放埋啲雞件落去炒, 香料既所有味道就會全部掛曬係啲肉既表面. 另外值得一提既係, 師傅係落鑊炒雞之前, 會先將雞件走油. 呢一點不但可以將雞既肉汁完全鎖曬係肉度. 亦可以令到雞件係爆炒既時候唔會咁容易散開. 做得好好! 因為得兩個人食飯既關係, 所以都唔敢叫咁多野食, 最後淨係簡單咁叫多個韮菜豬紅就作結. 味道好濃郁, 好適合用嚟“送飯”. 如果味道再辣一點就更好.  唯一美中不足就係碗飯太細碗, 份量再多啲會比較好. ;))