新南苑私房菜 (Closed)

朋友約食飯，話有個大滿貫餐，好誇張，坐喺位，肥牛、刺身、龍蝦任食，好過自助餐。咁我就唔使諗，比佢拍板。指定動作攞嘢飲先，好多罐裝同自家製飲品，睇睇吓，嘩，樽裝可樂同忌廉，馬上加分。有幾款小食，香甜鬆脆嘅酥炸合桃係餐廳自己製作，另外仲有鳳爪、泡菜等等，味道都唔錯。海鮮拼盤有刺身、鮑魚、螺肉等，鮑魚煮得爽口又夠腍，調味甜甜地，好正。然後來了招牌麻辣雞煲，連爐上，鑊氣十足，香氣撲鼻，又香滑又惹味。跟住火鍋要咗南瓜公仔蜆湯，出埸時嚟咗隻Minion! 大家好驚喜舉手瘋狂影相。原來公仔係用南瓜同甘筍蓉煮成濃湯。我第一次用南瓜湯打邊爐，原來幾好味，加咗幾次湯，個湯底依然好濃郁，果然真材實料！火鍋配料方面，有原隻波士頓龍蝦、蠔、大蝦、青口等。餐廳有魚缸，龍蝦超新鮮，又甜又爽，食得好痛快！碟牛肉都唔弱，有A4岩手縣黑毛牛肩胛、A4日本黑毛和牛後腰肉、本地手切牛頸脊，每種都食得出獨特的味道同質感，全部都牛香滿滿，一件不留！最後加少許不同的丸，都keep到水準。老闆趁空跟我們傾了幾句，提到可以每位加$20包廂，英超的話更營業至凌晨2點。呢餐盛宴有點貴，但打從心底十分滿足。