興記咖啡室

Open Now

Now Closed

今日約咗阿妹同朋友一齊去上環海味街逛逛，行到攰攰哋，想搵個地方坐低飲杯茶，係斜路見到「興記咖啡」四個大字，諗住咖啡咁出名，可以坐低抖抖嘆咖啡。行到門口見到貼滿食評介紹嘅神級西多士，當然唔可以錯過啦。三個師奶仔坐低，淨係叫咗一般份西多士、一杯奶茶、一杯鴛鴦，非常唔好意思，但係招呼嘅姐姐絕無鄙視眼神，仲好醒目，咁拎咗三隻叉出嚟，呢個真係要加分。西多士先上枱，隔住個口罩都聞到蛋香味。上面有牛油加煉奶，同一般落糖漿嘅做法唔同，入口脆皮加煉奶香滑，再加埋麵包嘅鬆軟，師父煎法令到西多唔油膩，呢度先係功夫，真係神級享受。至於奶茶，略為遜色，唔算香滑，再加啲奶應該會滑啲，同招呼嘅姐姐講，轉頭佢成罐花奶放咗枱面，今時今日，咁嘅服務態度真係不得了，即刻俾隻手指公👍🏻，佢話叫我同老細講，我梗係大大聲同老細再講多次讚吓佢啦。