湄南 (Closed)

將軍澳人口增長快，各式食肆都躍躍欲試，進駐各大新商場。POPWALK新開一間越南、馬來西亞加泰國料理，中文店名叫湄南，但英文名叫MEKONG(湄公)，唔知係故意表現越南同泰國菜都有吖，定係手民之誤？招牌餐牌都用TIFFANY BLUE,內櫳光猛，配以鳥籠設計燈飾，及淺木色枱，感覺新派。牆上有三兩張漁民農夫掃描作為裝飾，可謂聊勝於無，感受唔到半點異國風情。見微知著，對食物有無要求，好容易喺細節上反映。枱面只見兩樽調味料。士拉差辣椒醬同辣椒醋，反而唔見有魚露供應。湄南生牛肉湯河(午餐)$42樂壇有句說話，一人一首主題曲，我話，一國一款招牌菜。一碗牛肉粉就可以知道越南餐廳嘅水準。湯底牛味濃郁，值得一讚！牛河舖上生牛肉，以涫湯淥/浸熟牛肉，配以炸蒜、葱花同薄切洋葱，河粉爽滑，上枱時亦以指天椒同青檸佐食，整體嚟講尚算合格。美中不足，店方未有提供九層塔，芽菜份量太少，最令我留意嘅係，湯唔夠熱！令牛肉比較難由生變熟！但以生牛河而論，實屬中上之選。