滿江紅 (Closed)

朋友非常喜歡辣，所以我哋揀咗食川菜。呢間餐廳位於尖沙咀，地點非常方便，而且裝修又靚仔，入到去格調優雅，靠窗邊有卡位，坐得好舒服。而且擺設佈置都好有特色，非常適合食飯吹水。呢度既招牌菜係水煮魚，當見到水煮魚既圖片，你就會明白點解餐廳叫滿江紅。我們見到啲辣椒多到滿瀉咁帶，嚇到連識開辣嘅frd都怯一怯，最後都係揀咗酸菜魚。酸菜魚非常大盤，啲湯辣中帶辣，好惹味，桂魚煮得好滑，而且份量都好多，連湯一齊食非常好味。宮保蝦球辣辣地，帶出咗蝦嘅鮮味，蝦球炒得好爽，好彈，而且好大粒，啖啖肉。配料啲花生都好脆，好麻，食到出晒汗。食完呢兩樣餸條脷已經麻都冇晒感覺，所以叫咗一碗擔擔麵都要走辣。面條好Q，麻醬好香，掛在麵條一齊食，非常好味。食完呢餐飯，個人又麻又出汗，好似做完運動咁，越食越興奮。