Bentley's Cafe (Closed)

位於觀塘Bentley showroom旁嘅cafe，同樣屬其集團經營；明明只有兩枱客人，但一入門店員就問有無訂座，後尾先偷聽到有啲座位要預留起，可能留俾買車客🧐？Set Lunch價錢$122-162，六款選擇，不外乎海陸空扒餐、Pasta同Risotto；沙律餐湯二選一，配一杯餐飲。沙律不過不失，談唔上新鮮，感覺係雪藏菜；紫洋蔥比例佔半，怕洋蔥味嘅人較難接受。指明三成熟，上枱七成，差距甚遠；牛扒質素唔合格，無牛味，肉韌難切，多筋，幸虧燒汁調得幾惹味，拉返少少分。以薯蓉及煎煮茄菜作伴碟，前者留有薯粒，比較有咬口，不同坊間混和大量牛油嘅軟滑口感；茄瓜、西蘭花、甘荀煎得油身偏焦。成個餐最好應該係杯茶，因為用現成茶包沖成😂薄荷味濃，回甘，食完肉類飲幾解膩。每樣野一食完店員就趕住收碟，嘢飲未飲哂已經催賣單，呢個價錢呢個服務，真係只此一次。