咖啡灣 (荃灣千色匯) (Closed)

喺荃灣睇完中醫，去咗咖啡灣食埋晚飯先返屋企。好彩時間都算早，唔使等位；離開嗰陣已經八點半，出邊已經有幾檯客等緊，估唔到星期三都咁旺。的而且確食物質素係唔錯嘅。軟殼蟹可為呢間餐廳嘅名物，絕對值得一食。今次食咗軟殼蟹沙律(HKD88)，有三款醬汁可以揀：凱撒沙律/芝麻沙律/黑醋沙律，今晚揀咗芝麻。日式芝麻醬香味好夠，配埋香脆嘅煙肉粒，同沙律菜完全冇違和感。軟殼蟹係新鮮炸起，油炸嘅香脆同蔬菜爽脆，以及煙肉嘅卜卜脆好夾，係一試難忘。主菜揀咗墨魚汁帶子義大利麵(HKD98)。黑掹掹嘅墨汁意大利粉，配埋被染黑嘅帶子，賣相唔算特別吸引，但味道可口。食完當然成口污糟，如果同唔係好熟嘅朋友食飯，建議都唔好食呢碟呀，因為好容易出醜。飲品就試咗新品金莎朱古力拿鐵(HKD38)。朱古力味特別香滑，而且內有粒粒果仁，很有質感。味道令人覺得清新舒暢。上面的拉花就是一隻天鵝，大概與餐廳的英文名cafe swan有關。餐廳裝修很女性化，難怪所見食客都係女性為主。