Donkey & Sheep (Closed)

搵到呢間新開嘅西餐，睇見啲燒春雞同咖啡相好靚咁，評語都唔錯，專程去試。2道菜酥炸滷水春雞+沙律/湯/咖啡只係$88。如果要沙律/湯是但一樣，加嘢飲$18就有3道菜。好似今日咁唔肚餓，就咁主菜+cappuccino。春雞一上就聞到好香嘅滷水味，好似茶餐廳嘅炸雞脾咁。質感符合預期係嚡口，但個燒汁唔漏又提到味道，不過個人認為滷水醃料可以重手啲。薯條係原條粗切炸，外表略脆，裡面澱粉重香薯味。伴碟嘅沙律菜略為乾身又冇醬汁就普通。明明叫泡沫咖啡但就冇乜泡，感覺似飲鮮奶咖啡，但香滑又有咖啡味，當然唔預期啲豆新鮮炒有個性。成餐價錢唔使$100又冇加一，食物質素唔錯，坐窗邊有居高臨下風景，餐廳環境寧靜，服務員有禮，好收貨。