辦館 (雅蘭中心) (Closed)

趁放假去開雅蘭中心買嚟緊嘅露營用品，行到攰攰又喺時候搵食。行上一層見到辦館喎，上次喺銅鑼灣食過都相當唔錯，再望望A姐攰到黑面嘅樣，唔理喇，為求自保，即刻坐低開餐。黑松露油芝士多士：拎埋位已經聞到香噴噴嘅松露香味。食落口，芝士味相對較淡，但咁樣反而唔會搶走松露嘅味道，兩者配合得啱啱好！加上麵包烘到好鬆脆，作為下午茶嘅選擇相當唔錯。沙嗲安格斯牛撈丁：沙嗲牛肉麵成日都食到，但沙嗲安格斯牛撈丁，你又聽過未？上枱一刻已經被麻油味深深吸引住，而切成粒狀嘅牛肉，牛味濃又夠嫩滑，沙嗲汁同半生熟蛋撈埋一丁，直頭係享受，不過就略嫌沙嗲汁相對較少。棉花糖多士：直頭係邪惡首選！將多士同棉花糖放入焗爐，微焗至棉花糖輕焦，再淋上朱古力醬，對於A姐嚟講，簡直係人間極品！紅豆菠蘿油：A姐話我食菠蘿油好麻甩，但鬆軟嘅菠蘿包夾上厚切牛油，再加埋大大粒紅豆，其實每一啖都係邪惡嘅化身呀！紅豆鮮奶抹茶：濃濃嘅抹茶香，再加埋大大粒紅豆，配合得好好，又唔甜，十足十飲緊宇治金時！