旺泰特食

Open Now

Now Closed

每次去西貢玩水，4點幾就要去排隊沖涼，6點前要去到旺泰就可以順利入座。呢度有種泰國排檔嘅風味，長期滿座。玩完水當然要飲個椰青，等緊上菜已經暑氣全消。每人先食三串串燒。我最鍾意食燒全翼，雞肉好嫩滑。燒雞腎如果外層可以脆少少就更加好食。沙嗲汁唔辣，少少甜味好開胃。泰式炒金邊粉份量唔大，但係好足料，餸菜仲多過粉。醬汁酸酸甜甜，撈埋我最鍾意食嘅芽菜就更加清爽。豬肉生菜包又鮮又辣，香料十足，好適合夏天食，又係愈食愈有胃口。但係對我黎講太辣喇，只可以食一兩塊。