麵屋武蔵 (新鴻基中心) (Closed)

平日晚市客人只有三四枱，服務ok。點左番茄豚骨湯麵，再以優惠價加左個一口醬油手羽。拉麵湯底調較得唔錯，番茄嘅酸甜同豬骨湯嘅咸味好夾，比例幾好。麵條雖然唔係最cheap嘅港式拉麵質素，但同口感彈牙、有麥味、吸汁力強嘅正宗日本拉麵仲差好遠。碗中白色球狀物本以為係蒜泥，食落原來係薯蓉。湯同麵溫度都好足夠，可惜番茄、薯蓉嘅溫度影響晒成碗麵整體溫度，要扣分。溫泉蛋不過不失。豚肉份量比一般日本拉麵嘅肉量多，雖然薄切，但肉質好有咬口，有驚喜。一口醬油手羽嘅肉質同味道都調配得岩岩好，仲有啲配菜添。大致上味道可以，不過價錢太貴，喺灣仔莊士敦道嘅橫街，可以搵到同一價錢或更平嘅正宗日本拉麵，相對抵好多。