陶源酒家 (Closed)

姐夫家姐請飲茶，不過疫症下外出飲食亦要格外小心，今次姐夫選擇嘅中菜館真係令我食得安心，唔止環境闊落，枱同枱嘅距離夠大，而且食用餐具會浸喺100度熱水裏面，客人嚟到先設置，確保乾淨。職員帶我哋去到落地玻璃前嘅餐枱，窗外嘅海景真係令人感覺舒適，可惜今日嘅雨又霧遮擋咗一半。食物方面味道唔錯又足料，賣相精美，而且籠籠都出緊大煙，好新鮮。服務方面職員有禮有笑容，而且午巿正價食品有8折，環境服務品質嚟講性價比幾高。笋尖原隻鮮蝦餃，粒粒都飽滿，蝦肉爽口，皮唔厚，夾起亦無爛，唔錯。沙巴鮮蝦燒賣皇，大大粒，漲卜卜，幾好。不見天韮皇鮮蝦腸粉，每件腸粉都有粒大蝦仁，腸粉幾滑。香滑馬蹄牛肉腸粉，呢個我覺得牛肉太淋，味有啲怪。鳳梨鹹水角，好可愛嘅造型，咬落去又熱又軟糯。芋絲脆春卷，新鮮炸起，好香脆。豉蒜蒸新鮮排骨，排骨新鮮肥瘦適中，入口有少少油潤感，好味。醬皇豉蒜蒸鳳爪，鳳爪夠入味。高湯花膠瑤柱灌湯餃，有塊膠同蟹柳喺面好養眼。椒鹽雞軟骨，炸得幾好，夠脆，又唔會太乾太硬，好味。海蜇燻蹄，燻蹄夠厚，味道可以無特別。養顏紅棗糕，唔黐牙唔會太甜，唔會有膠嘅口感。招牌奶皇千層糕，好鬆軟，有奶皇味及蛋香味。