菓之店 (美芳街) (Closed)

係葵芳打滾咁耐，都時不時迷路，就好似行入葵廣咁，哈哈。星期日好想食甜品，但又想坐唔想掃住街咁食，記得志芳街個邊有間甜品店，行到去先知原來原本間西餐轉左做糖水鋪，原本間西餐都好有heart 架！中熱天時有冷氣有得坐，見餓餓地叫左個芝士撈公仔麵，配雞扒同司華力腸，有驚喜有驚喜有驚喜，真係重要事情講三次哈哈！雞扒醃得好入味亦都煎得好香，司華力腸就無咩難度嘅，而公仔麵方面，撈埋秘製芝士醬食，絕對係邪惡之選呀。值得一提嘅係佢咁樣雙拼，都係39蚊咋，而且仲送雪糕或者西米露，西米係大大粒嘅西米，配上椰汁食凍冰冰一流。食呢個餐仲加左15蚊飲佢個火龍果汁，新鮮紅肉火龍果打碎，透心涼，如果夾硬要彈嘅，就係打得太碎，無咩咬口，不過已經近乎完美架喇！話明糖水鋪，試下佢d甜點先，點了一個芒果盛宴，包捨新鮮芒果，芒果雪糕，芒果爆珠，同埋一個牛奶奶凍。芒果甜雪糕正常，爆珠有驚喜一粒粒卜卜脆，而奶凍唔會好甜但牛奶味濃，有時芒果太甜就品嚐唔倒奶凍嘅香，好矛盾呀！總括黎講其實真心抵，而且有心思又好食，店員都好有禮貌Tim 。