柳氏家 (Closed)

自從柳氏家喺香港開鋪之後一直好想試下，不過見佢啲分店好似越嚟越少，宜家得翻荃灣有，所以趁放假得閒就專程過嚟試下。今次食依個60分鐘嘅半自助午餐，主菜有5款可以揀，包括烤肉、炒雞、炸雞。一場嚟到想食炒雞，但因為唔太食得辣，驚食唔到炒辣雞，所以最後穩陣起見都係揀咗蜜糖味噌炒雞。除咗主食之外，出面亦有自助吧可以任食。限時60分鐘，一坐底已經把握時間即刻出去攞野食，我依個餐可以任食出面嘅前菜、熟食、雪糕同飲品。熟食有薯條、煎餃子、泡菜炒飯、炒粉絲、辣同唔辣嘅魚板年糕，辣炒五花腩。除咗覺得唔辣嗰鍋年糕煮得淋咗啲唔夠煙韌之外，其他味道都正常但唔算特別出色。不過抱住任食心態同埋主食嚟得實在太慢，我都encore咗啲熟食好幾次。個主角炒雞等左20幾分鐘先有得食，雞嘅分量唔算好多，另外仲有啲炒雜菜同埋有一舊番薯年糕。我覺得都幾好味，炒雞落咗蜜糖甜甜地，而且都幾夠味。雖然分量唔多但因為出面仲有其他野食，所以都食得好夠飽。依個價錢嚟講其實都Ok，不過60分鐘真係會食得比較急促。