小平津 (Closed)

老公要加班，襯住空檔時間都要同佢食晚飯傾下計，唔知去邊度食好，老公話不如去返拍拖前食過嘅餐廳回憶下。小平津，原來我哋剛認識未開始拍拖嗰陣去過一次，依家以夫妻身份再去，感覺特別，最驚喜係我覺得服務同食物質素都比幾年前好。芥末八爪魚，芥末可以再多少少，見議點軍艦會比較好，就甘食麻麻地。牛油果沙律，好新鮮，加埋啲青瓜絲好爽口鮮甜。軟殼蟹壽司，係呀之前都有食過，真係好食，所以忍唔住要叫半份食多次。大大件，軟殼蟹炸得香脆，大大啖好滿足。自家製燒雞肉丸，又係必點之選，肉質鮮嫩多汁，小心爆汁滴到周圍都係。海膽炒飯，炒得好香口，加上青瓜絲減低左油膩感，唔好以為份量少唔夠食，其實份量多，食到好飽。最後有甜品呀，士多啤梨雪糕，甜甜蜜蜜，下次等小b開始食大人嘢可以帶埋佢嚟，再次重遊小平津。