圓山台灣料理 (Closed)

為老友慶生，一行5個中女去咗呢間超過20年冇去過嘅台灣老店。以前同第一個男朋友去銅鑼灣嗰間已經執咗笠好耐，估唔到尖沙咀呢間經過疫情後仍然屹立不倒。先點了兩個前菜皮蛋肉鬆豆腐及圓山拼盆：皮蛋流心，肉鬆酥香，豆腐好滑，唔錯；拼盆有生腸、鴨舌、鹽水鴨及手工蛋卷，冇諗過四樣食物都好有水準，尤其是鴨舌，比起台灣老X祿好吃好多，生腸冇諗過咁滑，鹽水鴨個皮好薄肉身又好爽，蛋卷好特別，應該用咸蛋黃整所以好香口，令我有點去左台灣嘅感覺，一個字，正！到主菜，有2個朋友從不吃魚，但難敵超筍價錢嘅關係，叫左兩個「有魚有雞」孖寶：1）蒜片炸黃花魚拼口水雞 及 2）酸菜水煮魚拼宮寶雞。原本諗住果兩位厭魚朋友冇啖好食，點知佢地都食都停唔到口，一路食一路話係黃花炸得香脆可口，連個汁都大讃巧巧味（唔好意思太心急食剩魚骨先影相🤣），口水雞既香且麻，無懈可擊；酸菜魚相比炸黃花比較失色，雖然魚好滑，但酸菜湯不太入味，可能煮得唔夠濃，宮寶雞不過不失。最後叫了一桶即整豆腐花，嘩！不得了，真係好滑，又香豆味，5人一桶剛剛好。整體來說今餐令我們很滿意，最重要係，價錢大眾化，食物水準高，不過有少少咸，可能台灣嘢係偏濃味，另外地方亦濶落