囍越 (屯門市廣場) (Closed)

四月過後天氣熱熱地，食越南菜就啱晒啦！呢日去屯門睇完戲就去左屯門市廣場覓食，因為好想食d酸酸甜甜嘅菜式，所以見到間越南菜好似唔錯，就決定試下。間餐廳分開左兩邊，一邊嘅坐位係餐廳入面，一邊嘅坐位係商場走廊，而我地就被安排坐係走廊果邊，隔住玻璃仲可以望到商場嘅平台，都幾開揚。我地叫左鮮蝦柚子沙律、小食拼盤同蛋網炒金邊粉。小食拼盤包括燒香茅牛肉蝦片、絲網春卷、燒豬耳扎肉及青木瓜絲沙律，當中最中意沙律嘅醬汁，酸得黎少少澀澀地，唔會甜，好開胃。而香茅牛肉蝦片口感好豐富，香茅味道突出，整體唔錯。3道菜入面最中意呢個柚子沙律，好清新！粒粒飽滿嘅柚子肉，一咬落去D柚子汁迫晒出黎，配上彈牙蝦肉同爽口蘿蔔絲，好正，食到停唔到好！蛋網海鮮炒金邊粉嘅賣相精緻，不過食落同其他餐廳金邊粉味道差唔多，偏甜，沒甚特別，重點係份量真係小左d。