Hatsu Japanese Restaurant (Closed)

今日咁啱過金鐘做野，所以晏晝就約媽媽喺嗰頭歎返個日式午餐！喺美國銀行中心嘅Hatsu環境都幾好幾舒服，又有好多款定食可以揀！我食火炙平目裙邊丼，有成十幾塊平目裙邊，每一塊都好肥美，師傅輕輕用火燒一燒個面，啲油就咇曬出黎，真係好正！平時已經好鐘意食平目裙邊壽司，估唔到有成碗平目裙邊丼，簡直係我至愛呀！我仲用25蚊加左隻特大赤海蝦刺身，非常大隻，差唔多有筷子咁長，仲好新鮮！媽媽就食燒鯖魚天婦羅定食，我偷左佢少少野黎試下，鯖魚都燒得啱啱好，而天婦羅都幾多，有兩隻蝦同啲蔬菜，個天婦羅漿唔太厚又脆，算係唔錯呀！另外每個餐都有跟味噌湯同蒸蛋，最後又可以揀咖啡或者雪米糍。提一提，仲有任食自助沙律吧，不過個餐實在太豐富喇，我地冇再食沙律喇！雖然話百幾蚊一個定食，但有咁好嘅質素同咁多野食，其實係抵食嘅！