金龍冰室 (Closed)

呢間金龍冰室新開冇耐已經比佢入面淺藍色既裝修吸引到，咁岩約左朋友係附近就一齊黎試試佢！望到隔離野食都幾大份，決定叫兩個意粉同一個雜扒先。流心奄列餐跟芝士汁，意粉其實冇咩味，個人覺得太淋，所以個汁真係好緊要，最滿意係雞扒，超大件入味又脆卜卜，熱辣辣切果陣仲有汁咇出黎！雜扒餐跟湯同薯菜，有齊牛雞扒、腸仔，最特別係佢仲有炸帶子同煙三文魚。紅湯味道唔錯唔似其他餐廳溝勁多水，絕對會食肉食到好滿足！牛油帶子意粉既意粉就彈牙啲，而且有唔少帶子，份量足。因為坐左好耐，後尾見又肚餓就叫左好多小食，點知原來小食先係最正果part！芝士雜菌西蘭花，每舊西蘭花都可以拉到絲，芝士控必叫！而蜜糖雞翼真係甜甜地有蜜糖味，同出面餐廳叫蜜糖雞翼但鹹多過甜好唔同！最後四個薯條怪仲叫左黑松露薯條，食過咁多薯條估唔到仲可以有驚喜！雖然薯條唔係好粗好大條果隻，不過個醬真係超級好食，完全停唔到口，食左幾條先記得影相，一大碟話咁快就比我地掃哂！下次黎一定要再叫其他小食先得！