錵の工房 (Closed)

啱啱同女友上完畫班堂，正好係LUNCH時間就同佢黎左樓下嘅錵之工房食晏。呢度主打係日式家庭料理，所以環境都同日本嘅食堂有幾分相似。先睇睇大MENU，飯/意粉/漢堡及各種小食都一應俱全。而LUNCHSET嘅選擇更多，拉麵/烏冬及定食都有，所以就同女友各點左個，大家SHARE黎食。首先係我馬鈴薯燉豚肉定食，跟餐仲有麵豉湯/沙律同埋腌青瓜，份量十分豐富。豚肉燉煮得好入味，咸甜中帶點蘋果微香，咁嘅做法就同日式咖喱一樣以生果嘅酵素軟化豚肉嘅質感，令佢更入味同香口。而薯仔同蘿白同樣好腍，輕輕一夾就鬆開，入口即化。女友因為唔太餓，就點左個吉列厚切豬三文治。但真係唔講得笑兩件三文治十分巨型，起碼兩吋厚。大食女友都話食一個就飽了，要我包底。三文治用料十足，而且有誠意嘅地方係佢先切開塊豬扒，再釀入大量芝士後才攞去炸，所以食時拉絲同爆漿效果十足。同時令豬肉KEEP住嫩身，食落無咁乾口。飲品方面，UPGRADE左SET LUNCH嘅跟餐飲品做水果花茶，味道係荔枝/玫瑰及草莓三者混合，香味濃郁又解渴。個茶包浸耐啲都無苦澀味，放半包砂糖去平衡返個味道啱啱好，幾好飲。