雲長小龍坎老火鍋 (Closed)

天氣凍冰冰，個個都爭住去打邊爐。我最鍾意就係去啲新開嘅火鍋店試下。呢間充滿中國裝修嘅打邊爐舖好似幾掂喎。田園蕃茄湯 ($128)呢個普通嘅蕃茄湯底唔算平，但勝在蕃茄味好夠。最搞笑係個鍋有兩個龍頭，果然氣勢迫人。小龍上上籤拼盤 ($128)名就好有趣喇，原來係將火鍋食材變成串燒，倒插係碎冰上面。呢個 Idea 幾好，令人食得好方便，又唔怕跌咗落爐底執唔返。材料都好豐富，有墨魚仔，鮑魚，芝士腸，手打丸同鮮蝦。玫瑰豬頸肉 ($58)賣相好花心思，睇落以為得三舊豬頸肉，其實分開後會好多件。豬頸肉好爽口，有啲肥紋，好高質。花雕雞件 ($98)用花雕浸住嘅雞件上面仲放咗杞子，雞件非常入果，而且仲好鮮甜嫩滑，啖啖肉好掋食。翡翠豆苗 ($38)打邊爐點都要食返啲菜，唔好成日娃娃菜、油麥菜咁悶，冬天嘅豆苗好靚，好嫩口又無渣。