James Bonbon Bakery

Open Now

Now Closed

一直都知最近cwb開咗間勁多人排隊👣👣嘅麻糬波波舖頭，聽聞要排成幾個鐘嘅我一直心思思試👉🏻👈🏻👉🏻👈🏻大概愛吃的人運氣不會太差，夜晚食飯時間見居然無乜人排隊，再東問問西問問，原來又就到出爐時間，考慮三秒之後就自動自覺地去排隊🤣舖頭寫明每人限買6個，當日除咗簡單嗰兩款，淨係有三種特別口味可以買。我地分別買咗原味QQ、菠蘿QQ、伯爵茶QQ、朱古力QQ同抹茶QQ。一拎上手熱辣辣，我地買完就急急臉行去附近休憩處享用🤩喺特別口味當中，最好食就係伯爵茶口味（$10/個），茶味濃香，脆皮香甜。朱古力同抹茶相比之下就略為普通，但都唔會令人失望。比較平實嘅口味就有原味QQ、菠蘿QQ（$15/2個）。因為無菠蘿脆皮嘅關係，原味食落同坊間其他普通麻糬無分別。相反菠蘿QQ食落香甜，如果對特別口味無興趣嘅朋友，性價比更高。實在太多食唔哂，我就拎買多咗嘅抹茶QQ翻屋企，隔夜之後用焗爐整熱之後，同新鮮出爐嘅時候都有七、八成似，可以買翻屋企慢慢食！排隊其間都見有唔少街坊去買蛋糕面包，話哂都係由前四季酒店西餅師傅主理嘅餅店，門口亦都有notice話比人知用高級材料，就算小店經營都唔會輸比連鎖店。