White Hse. (Closed)

最近發現銅鑼灣新開咗一間樓上cafe — 白房子White Hse。小店裝修佈置充滿心思，譬如打卡花牆、白磚設計、自然採光，鐘意影相嘅朋友黎到一定好開心。香蒜芫茜什菌炒意粉 ($102) 加入滿滿嘅蒜頭、芫茜調味，香濃惹味。什菌爽口彈牙，配搭炒至乾身嘅意粉，一軟一硬，口感豐富。不過意粉偏硬，可以煮多幾分鐘。二重奏忌廉煙肉芝士貓耳朵 ($118) 以雙重芝士、濃厚忌廉、肥美煙肉烹煮而成，非常邪惡。貓耳朵掛滿稠傑醬汁，一𢳂起馬上拉絲。加上芝士表面略為炙燒至焦香，嗅起黎食慾更為大增。不過食到尾會有d膩。建議兩個人share。白房子曲奇杯 ($58) 係當日最令人有驚喜嘅菜式。甜品不但精巧可愛，味道亦相當唔錯。曲奇杯身為朱古力消化餅，味道甜而不膩，口感有層次。倒入牛奶再品嚐又有另一番滋味。蜂蜜牛油果香蕉 Smoothie ($58) 以天然蜂蜜、水果打成，絕無額外加糖，非常健康。而且水果比例重，即使放耐咗都唔會變稀變淡。Smoothie 入口綿密幼滑，無冰粒感。香蕉味重，可惜牛油果味唔突出。